Nag-positibo sa coronavirus disease ang anum ka mga na-close contact sang GSO utility worker nga taga Brgy. Tangub, Bacolod City nga damlag pa nag-positibo man sa amo nga virus.
Sa interview sang DYHB, Ginpahayag ni Brgy. Tangub, Punong Barangay Noli Villarosa nga ang bag-o nga mga kaso ang naghalin sa Purok Seaside nga damlag pa ginpaidalum sa lockdown.
Ang Purok Seaside may apat ka Zone kag ang apektado amo ang Zone 1 kag Zone 2 sa diin ang lockdown yara lang sa 30 meters radius halin sa balay sang nag-positibo.
Suno kay Villarosa, 155 ka mga balay kag 466 ka mga pumuluyo ang apektado sa Zone 1 kag 2.
Sa bag-o nga mga kaso, lima diri ang pamilya sang utility worker nga taga General Services Office samtang ang isa, nagkadto gid lamang sa ila puluy-an kag nalatnan suno kay Villarosa.
Bangud sini, nagdangat na karon sa siyam ka mga tawo ang nag-positibo sa COVID-19 sa Purok Seaside kon diin una na nga na-infect ang iloy kag ang bata sanga mo nga worker sang GSO.
Pahayag ni Villarosa nga karon ang 6 ka mga nag-positibo ang yara sa ila nga balay naka home quarantine kag ginapatigayon naman ang rapid test sa mga naka-close contact sang bag-o nga mga nag positibo.
[image: image.png]
