Patay ang apat ka tuig nga bata nga lalaki sang maluthangan samtang nagasakay sa kabayo upod ang iya amay sa Sitio Palasanan, Brgy. Mahalang, Himamaylan, las-7:00 sang aga, Oktubre 14.
Santo sa report sang Himamaylan CPS, pauli na sa ila balay ang mag-amay nga Jonlee Salgado, 28-anyos kag biktima nga si John Lloyd gikan sa pagpaligo sa suba sang ila kabayo sang sila ang ginluthang.
Nagakulukanta pa ang bata samtang nagahakos sa iya amay sakay sa kabayo nga nagapalapit na sa iya balay.
Matapos ang lupok, nakit-an ni Jonlee ang suspek nga si Jigger Dela Torre, 25, nga naga-uyat sang indi pa matumod nga kalibre sang armas. Matapos ang pagpangluthang, nagpalagyo si Jigger upod ang iya magulang nga si Jay-R Dela Torre, 30. Nabalikdan na lang sang amay nga nahulog na sa kabayo ang iya bata kag may pilas sa ulo.
Sa interview naman sang DYHB sa hepe sang Himamaylan City Police Station nga si Police Major Romeo Vargas, , amay kuntani ni John Lloyd ang target sang pagpangluthang.
Santo sa imbestigasyon, posible nagdumot si Jigger kay Jonlee bangud sang sunluganay. Suno kay Vargas,, duha ka bulan antes ang krimen, magkaupod nga nag-inom ang duha kag ginsulog ni Jonlee si Jigger nga 25-anyos na ini apang wala pa siya sang asawa. Sumugod sadto, talagsa na lang nga makit-an ni Jonlee si Jigger sa ila lugar.
Sa karun, at-large si Jigger kag ang iya magulang nga si Jay-R apang pasakaan sila sa gihapon sang kaso nga murder kag nagapanawagan man ang hepe sa mga ini nga magsungka na lang.
[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
