Ginakabig ni Dr. Julius Drilon, head sang Corazon Locsin Montelibano Memorial Regional Hospital (CLMMRH) nga work in progress sa bahin sang management kag observation ang pag-handle sang coronavirus disease bangud wala pa diri sang nagakaigo nga data kag impormasyon.
Sa interview sang DYHB, ginpahayag ni Drilon nga ini kasunod nga base sa ila observation sa mga kaso sa Iloilo kag sa nag-positibo sa La Castellana amo nga indi bastante ang 14 ka adlaw nga quarantine kundi, apat tubtub anum ka semana agud nga ma-iliminate sang lubos ang virus pagwa sa lawas sang pasyente.
Suno kay Drilon nga mas maayo kuntani nga himuon amo nga ang tanan nga mga tawo nga may sintoma kaangay sang diarrhea ukon influenza kag pneumonia ang gilayon na lamang nga ipaidalum sa swab test.
Angut sini, ginapasiguro sang hospital chief sa pumuluyo sang Negros Occidental kag Bacolod City nga indi sila magpabaya kag padayon nga nagatinguha ang mga frontliners sang regional hospital para matatap ang mga pasyente.
Pahayag ni Drilon nga isa ka ehemplo kon paano ka dedicated ang mga health care workers amo ang nurse nga nagabusong nga apesar sang iya kahimtangan padayon ini nga nagserbisyo sa mga pasyente.
Samtang, nagpahayag man sang pagpasalamat si Drilon sa komunidad sang probinsya kag ciudad sa suporta nga ila ginahatag sa mga health care workers indi lamang sa material nga butang kundi sa words of support kag encouragement ilabi na ang pangamuyo.
[image: image.png]
