Arraignment sang criminal complaint ni konsehal Ramos batok kay Kalaw Puentevella ginpatigayon subong nga adlaw

26

Patigayunon subong nga adlaw ang arraignment sa criminal complaint nga ginpasaka ni Councilor Dindo Ramos batok kay former Councilor Jesus Claudio “Kalaw” Puentevella matapos siya sini ginsumbag kadungan sang session sang Sangguniang Panlungsod sang Bacolod sang Setyembre 12, 2018.

Sa interview sang DYHB kay Councilor Ramos, kahapon pa man lang siya nakahibalo nga ginserbehan na sang warrant of arrest si Puentevella nga gilayon naman nagpyansa sang P36,000 para sa iya provisional liberty. Suno kay Ramos, ang arraignment sa kaso nga direct assault ang hiwaton subong nga adlaw paagi lamang sa online proceedings. Nahibaluan nga magluwas sa kaso nga Direct Assault, nagfile pa si Ramos sang kaso nga Disturbance of Legislative Proceedings batok sa anay konsehal.


Samtang sa pagpakig-angot man sang DYHB kay former Mayor and Congressman Monico Puentevella, amay ni Kalaw, ginpahayag sini nga kahalam-utan ang kaso bangud sa baylo nga ang pandemic ang atubangon sang mga opisyal sa karun, ini pa ang gina-una. Ginapasalig naman sang amay nga Puentevella nga maga-file man sila sang counter charges batok kay Ramos bangud may mga testigo suno sa iya nga nakakita nga ang incumbent councilor ang naghangkat sa iya bata.

Madumduman nga nagluntad ang tensyon sa tunga ni Ramos kag Kalaw samtang ginatalakay sang una sang SP ang request ni Mayor Evelio Leonardia para sa authority to sign sang agreement para sa construction sang cell No.2 sa sanitary landfill sa Brgy. Felisa nga nagabalor sang P49 million, sa idalom sang IPM Construction and Development Corp.

[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments