BINALBAGAN, NEGROS OCCIDENTAL – Indi interesado nga magpasaka sang kaso ang pamilya sang isa ka babayi nga ginbuno patay sang iya kaugalingon nga bana matapos nadakpan ini nga nagahulid sa iban nga lalaki kahapon sang kaagahon sa isa ka barangay sa banwa sang Binalbagan.
Ang biktima isa ka 55 anyos nga ginang, kasado, isa ka laborer samtang ang suspek nga iya man lamang bana, naga edad sang 57 anyos, laborer kag lunsay naga-istar sa amo nga banwa.
Suno sa imbestigasyon sang Binalbagan Municipal Police Station pinaagi sa hepe sini nga si Police C/Inps. Albert Sy, ang insidente natabo may mga las 4 sang kaagahon kahapon sa lugar sang mag-asawa.
Ginpahayag nga wala na gali naga-puyo sa isa ka balay ang biktima kag ang suspek gani ang babayi ang nagpatindog sang isa ka kamalig malapit man lang sa ila balay.
Nahibaluan nga ang suspek ang may diperensya sa iya panglawason (health) kon diin ini ang ginatakdan sang catheter.
Antes pa man sang insidente, nagaduda na ang mister gani kahapon sang kaagahon, iya gin-panilagan ang asawa kag ginkadtuan ini sa iya kamalig.
Didto kag nakita sang suspek nga ang iya asawa ang may kahulid nga iban nga lalaki gani wala na siya naka-pugong kag gin-confront ang mga ini.
Nagsumbaganay pa ang suspek kag ang 48-anyos nga lalaki sang iya asawa nga gilayon naman nagpalagyo.
Ginsunod sang suspek ang iya asawa kon diin iya ini gin-buno sang tatlo ka beses kag fatal nga naigo sa iya tiyan nga amo ang gintunaan sang iya kamatayon.
Gin-detain sa Binalbagan Municipal Police Station ang suspek apang posible ini ang ma-release man sini nga adlaw bangud wala sang plano nga magpasaka sang kaso ang pamilya sang babayi./dyHB BACOLOD
