BACOLOD CITY – Ginbuno ang isa ka traysikol driver matapos nga naglalisay ini sa kaangay man niya nga driver bangud gid lamang sang biyahe kaina sang kaagahon sa Bacolod Reclamation area.
Nakilala ang biktima nga si Ricky Gutib, 38 anyos ang edad, single kag pumuluyo sang Brgy. Alegria, banwa sang Murcia.
Suno sa biktima nga may mga las 3 kaina sang kaagahon sa atubang sang Bacolod Pavilion Hotel sa Reclamation Area, ginsaway niya ang suspek nga isa man ka traysikol driver nga indi ini pwede maka-biyahe sa amo nga area bangud may asosasyon sila.
Apang, wala nagpamati ang suspek gani nagluntad ang paglinalisay tubtub nga ginbuno sini ang biktima.
Nag-angkon sang pilas si Gutib sa iya wala nga abaga kag wala nga paa.
Gindala sa Corazon Locsin Montelibano Memorial Regional Hospital ang biktima kon diin padayon ini karon nga ginabulong./dyHB BACOLOD
