Lapuyan, Zamboanga del Sur – Dead on the Spot ang usa ka 34-anyos nga babaye samtang paingon kini mokuha sa iyang 4P’s payout sa lungsod sa Lapuyan, Zamboanga del Sur, ala 1:00 kaganiha.
Naila ang biktima nga si Samira Tagadtal Mayo, minyo ug dunay lima ka anak, residente sa Brgy. Pampang, coastal barangay sa Lapuyan, Zamboanga del Sur.
Nasayran sa inisyal nga imbestigasyon nga padulong ang maong biktima sa sentrong bahin sa lungsod aron pag-withdraw sa iyang cash card sa 4Ps sa pagnaug sa biktima gikan sa pumpboat.
Dali kining misakay sa tricycle apan samtang pagawas na sila sa pantalan, kalit dunay miagi nga duha ka lalaki nga naka-bonnet sakay sa motorsiklo ug sa walay langan gipusil ang biktima.
Nakaangkon og igo-pinusilan ang biktima sa iyang kaluwasan hinungdan sa iyang hinanaling kamatayon.
Swerteng wala maigo ang driver sa tricycle nga si Loloy Catubig nga naghapa-hapa samtang nagmaneho sa iyang motor.
Miikyas ang mga suspetsado sakay sa ilang motorsiklo.
Narekober sa crime scene ang unom ka mga basiyo sa bala sa wala pa matinong kalibre sa pusil.
Naghimo na og makuti nga imbestigasyon ang kapulisan aron madakpan ang mga suspek sa krimen.
