LA CASTELLANA, NEGROS OCCIDENTAL – Naggutok ang covered court sang banwa sang La Castellana lakip na ang dalan sa atubang sang munsipyo kun sa diin ginpahamtangan sang dako nga screen agud makit-an ang pag sinaot sang mga dancers sa Centennial Bailes de Luces Arena Dance Competition.
Linibo ka mga pangayaw ang nagdagsa agud masaksihan ang mga matahum nga costumes kag nanuhaytuhay nga mga duag sang suga nga amo ang nangin naga-inggat sa mga bayo, head dress kag props nga tuman katahom tulukon ilabi na sa tion sang kagab-ihon.
Sa pihak nga bahin, daku naman ang kalipay ni Mayor Rhumyla Nicor – Manguilimutan nga nangin madinalag on ang selebrasyon sang ika isa ka gatus nga anibersaryo sang banwa sang La Castellana kag bisan pa naglawig ini sang 22 diyas wala gid sang insidente nga na record sa talatapan sang kapulisan sa banwa.
Sa madumduman nagsugod ang selebrasyon sadtong Disyembre 14 sang gab-i kun sa diin nangin dinapit nga bisita si Jericho Rosales kag Bamboo kadungan sang switch-on sang mga Christmas lights sa palibot sang munisipyo kag plaza sang La Castellana. / Grace Supe photos/RMN
