Malay, Aklan — Patay ro sangka bakasyunista matapos nga makuryente samtang nagapaligos sa ginadayunan nga lodge sa Brgy. Balabag, Boracay, Malay, Aklan.
Ro biktima hay nakilaea nga si Mary Joy Rata, 29-anyos ng Valencia St., Sampaloc, Manila ag temporaryong nagadayon sa MN Boracay Lodge Inn sa nasambit nga isla.
Sa imbestigasyon it Boracay PNP, nasayuran nga nagapaligos rong biktima sa banyo it andang kwarto tag ginbuksan kara rong heater it andang shower.
Gulpi eamang nga nakabati it singgit ro anang nanay halin sa banyo nga eagi man karang gin-adtunan, ginkataok ag gintawag ugaling uwa raya naga sabat.
Dali-dali imaw nga nagtawag it empleyado ko nasambit nga Inn para nga buksan rong pwertahan it banyo pero nakibot eamang ra sanda tag makita nga nagakaya eon rong biktima ag may paso sa eawas tuga it pagkakuryente.
Eagi man nga gindaea sa hospital rong biktima pero ginbawian man raya it kabuhi samtang ginabueong bangud sa naangkon nga 2nd degree burn.
Sa makaron hay nagapadayon pa rong imbestigasyon it mga otoridad angot sa nasambit nga insidente.
