PONTEVEDRA – Ginalagas sang Pontevedra Police Station ang duha ka mga kalalakin-an nga naghold-up sa BoyBoy Store nga ginapanag iyahan ni Brgy. Kagawad Edward Dominic Algara.
Natabo ang insidente sa tindahan sang Brgy. Antipolo mga las 5 sini gid lamang nga hapon.
Basi sa panaysayon sang asawa ni Kagawad Algara nga si Helen Algara nga nakibot nalang sya sang may lalaki nga nagdeklarar sang hold-up.
Suno sa iya nakuha sang lalaki ang wala pa nahibaluan nga kantidad pero puro mga sinsilyo tungod natago na nya ang mga bilog nga iya na benta sa bug-os nga adlaw nga pagbaligya.
Basi sa panaysayon sang mga nakasaksi nga 2 ka mga lalaki ang ila nakita kag dali dali ini nga nagpalalagyo kag nagsaka sa bungyod sang Amorabita nga malapit man lang sa proper sang Antipolo.
Sa karun padayon nga ginalibot sang mga police kag Brgy. Peace Keeping Action Team ang lugar kun sa diin ginasiling nga nagpalagyo ang mga hold-aper. / Grace Supe
