Balita gikan sa RMN Malaybalay: Pamahayag sa NPA nga 13 ang patay sa AFP karong bulana, fake news matud sa 4th ID, Philippine Army

Gihimakak sa 4th Infantry Division, Philippine Army ang gipakatag nga taho sa New Peoples Army – North Cental Mindanao Region nga adunay 13 ka patay samtang 10 ang samdan ka sundalo sa engkwentro niini sa NPA karong bulana sa Nobyembre.

Una ninii, sa interview sa RMN DXMB Malaybalay ngadto kang Ka Malem Mabini, ang tigpamaba sa NPA-NCMR gibutyag niini nga madaugon nga nikontra ang ilang grupo sa mga operasiyon sa kasundaluhan sa Northern Mindanao ug Caraga Region nga nagresulta sa pagkapatay matud pa sa maong ihap sa mga sundalo ug nagresulta sa usa ka patay sa ilang panig.

Samtang gibutyag ni Capt. Reggie Go, ang 4th Division Deputy Public Affairs, Chief sa 4th ID nga usa ka bakak ang maong taho nga gipakatag sa rebeldeng grupo.

Matud ni Capt. Go nga walay gikataho nga namatay sa ilang tropa.

Gibutyag niini nga kung aduna may mamatay ila kining hatagan og bili ang kinabuhi sa usa ka sundalo ug gihatagan nila ug pag-ila ang sakripisyo niini maong dili matago kung aduna may mamatay sa ilang hanay.

Matud ni Cpt. Go nga klaro matud pa nga usa ka bakak ug tinumo-tumo lang ang maong gipakatag nga taho sa NPA.

Balita gikan sa RMN Iligan: Inahan sa namatay nga Garbage Collector nga si PJ Catubig hangtud karon naglisod pa ug dawat sa kamatayon sa iyang anak

Walay kabutangan sa kasakit nga gibati sa inahan sa namatay nga garbage collector nga si PJ Catubig human nadisgrasya ang gisakyan niining Garbage Truck niadtong adlawng Martes.

Matud ni Arlene Catubig nga nakurat nalang sila sa taho dihang iyang nasayran nga patay na ang iyang anak nga nadisgrasya sa Barangay Bonbonon, Iligan City.

Bisan sa pagpanamilit lang sa iyang anak una kini mihawa sa ilang balay wala gayud nila nabuhat sa usag-usa hinungdan nga gikasakit gayud niya og maayo ang kalit nga kamatayon sa iyang anak.

Ang biktima adunay tulo ka gibilin nga anak ug tulo na usab ka tuig nga nahimong casual isip garbage collector.

Balita gikan sa RMN Butuan: Balay sa bise Mayor, gi-raid

Gi raid sa mga sakop sa Agusan del Norte Police Provincial Office ang panimalay ni Vice Mayor Glicerio Monton ang bana ni Mayor Jasmin Monton sa Jabonga, Agusan del Norte.

Sa kasamtangan, dose na ka mga dagkong sachet sa shabu ang nakumpiska sa kapulisan sa nagpadayong search ug usa ka granada.

Alas tres pa kaganinang buntag gisulod ang iyang panimalay bitbit ang search warrant nga giisyu sa korte.

Matud sa Bise Mayor nga dili makatarunganon ang gihimong pagpangronda sa iyang panimalay dihang diha mismo ibabaw sa bowl nakita ang usa ka granada.

Balita gikan sa RMN GenSan: Armas sa kustudiya sa 10th ID, mas daghan ang gikan sa mga nisurender

General Santos City— Gipaklaro ni Major General Noel Clement, commanding officer sa 10th Infantry Division nga mas hapsay na ang peace and order situation sa area of responsibility sa 10th ID.

Sumala niya nga kung hisgutan ang presensya sa NPA, giangkon niya nga aduna gihapon pipila apan gibutyag niini nga dili na sama kaniadto.

Pasigarbo niya nga sa karon matud pa mas daghan ang armas nga anaa sa ilahang kustudiya gikan sa mga miyembro sa npa nga mibalik sa sabakan sa gobyerno kung itandi sa mga armas nga ilahang narekober sa pagpahigayon ug operasyon sa kabukiran.

Pasabot lang matud pa kini nga nawad-an na ug respeto ang mga miyembro sa kalihukan ngadto sa ilahang mga lider busa padayon ang iyahang panawagan ug pag-awhag ngadto sa mga nahibilin pa sa kabukiran nga mubalik na sa sabakan sa gobyerno gumikan dunay daghang programa nga tanyag ngadto kanila.

Balita gikan sa RMN Davao: SITG-Villaceran aduna nay persons of interest

Davao City – Positibo ang SITG-Villaceran nga hingpit nang masulbad ang kaso may kalabutan sa pag-ambush sa pamilya Villaceran diin kini gikamatay ni Brgy. Captain Paulito ‘Jun’ Villaceran lakip ang bodyguard niini nahitabo sa Purok Avocado, Barangay Sion, Kaputian District, Island Garden City of Samal.

Sa eksklusibong pakighinabi sa DXRC RMN Davao kang IGACOS PNP station commander P/Sr. Supt. Guissepe Geralde, gibutyag niini nga maayo ang dagan sa ilang imbestigasyon sa pagkakaron diin aduna na silay gidudahang persons of interest.

Segun niini nga tulo ka mga anggulo ang ilang ginalantaw karon diin una niini ang isyu sa DANECO.

Nasayran nga kanhi membro sa board of directors ang maong kapitan kinsa usa sa lima ka mga nag file og kaso batok sa CBA board of directors kinsa una nang gipamatay.

“Everytime magkita mi mao na ang iyang ginastorya sa akoa nga ang threat niya is taas kaayo tungod sa CBA nga gi-file niya nga kaso. I think way back 2015 or 2016 pa ang threat sa iyaha,” matud niini.

Ikaduhang motibo ang pagka-realty broker sa iyang inahan diin siya nadamay ug nasayran nga una na sab gipatay iyahang igsuon.

Ikatulong anggulo niining kaso ang isyu-politikal diin ginasubay sa pagkakaron kung kinsa ang mga nakakontra niini atol sa iyang pagkakapitan.

Gani pipila ka adlaw gikan karon, malaumon si Geralde nga mapasakaan og kaso ang suspek sa pagpatay sa maong kapitan.