Ginahingyo sang SOCKSARGEN Responsible Miners Association ukon SRMA nga matigayon na ang copper – gold mining project sa banwa sang Tampakan, South Cotabato.
Sa sulat nga ginpadala sang asosasyon kay South Cotabato Governor Daisy Avance Fuentes ginhatagan sini punto ang mahatag nga kaayuhan kon madayon ang proyekto sang SMI sa Tampakan partikular na nga makabulig suno pa ini sa pag-address sang kapigaduhon, makatanyag sang madamo nga trabaho kag magaumwad ang ekonomiya sang probinsya.
Makabenepisyo man sini suno pa indi lang ang South COtabato kundi ang bug-os nga Mindanao sa kapin 2.9 billion nga tonelada nga copper deposit sa Tampakan.
May-angot sini ginahingyo sang grupo nga i-revesit, i-review kag i-lift ukon isuspindir sang Provincial Government sang South Cotabato ang provision sang Environment Code nga nagaban sang open pit mining sa probinsya.
Ikaduha ang pagrevisit man sang SMI sa ila nga project plan para mas mabuligan ang mga apektado nga komunidad sa proyekto kag ikatatlo amo ang paghatag pagtamod sang DENR kag LGU sa mga isyu kapareho sang permitting kag land ownership.
Gin-indroso naman ni Governor Fuentes ang nasambit nga resolution sang SRMA sa Sangguniang Panlalawigan para sa nagakaigo nga aksyon kag ini ang ginrefer na sa Committee on Environment sang Sp sa ginpatigayon nila nga regular session sang Lunes nga adlaw.
Samtang ang nasambit nga resolution sang SRMA ang ginpalab-ot man sa Office of the President, DENR, RDC 12, DILG, Lgu Tampakan kag iban pa nga sector.
