BACOLOD CITY – ( 3rd UPDATE) Kon indi lang sa ila kabataan, ipa-priso gid sang bana ang iya asawa nga nagluib sa iya kag nagbiya sang ila mga kabataan sang makapila ka beses sa isa ka barangay diri sa ciudad sang Bacolod.
Ini ang pahayag samtang nagahibi sang 51-anyos nga bana nga damlag pa ginreport nagpa-blotter sang iya 45-anyos ang asawa matapos iya ginpalayas si mister sa ila balay kay may iban na ini nga kahagugma.
Sa interview sang DYHB, ginpahayag sang bana nga apesar makapila ka beses na siya nga gintunto sang iya asawa kon diin ang pinaka-lala diri amo ang pagbusong sini nga iban nga lalaki nakuha pa niya gihapon nga patawaron si misis kag ginhatagan sang tsansa.
Apang wala na naagwantahan pa sang bana ang pinaka-ulihi nga paglu-ib sang asawa kon diin ang ila mismo 21-anyos nga anak nga lalaki ang naka-tukib sa pagpanglalaki sang ila nanay pinaagi sa text message nga iya nakita sa cellphone sang babayi.
Suno sa bana nabaton na niya ang pagluib sang iya misis gani ang luyag na lamang niya karon nga matabo amo nga i-settle ang ila sitwasyon kag magpirmahanay sang kasugtanan para indi na sila magpasilabot sa isa kag isa.
Nahibaluan nga si misis ang nagapanglabada kag kon kaisa naga obra man sa kampo, samtang si mister ang isa ka trisikad driver kag ini sila ang may 6 tanan ka mga kabataan./Photo: Si Tatay Nelson upod si RadyoMan Albert
