BACOLOD CITY – Nagapangayo karon sang bulig ang isa ka bana agud nga makapauli diri sa ciudad sang Bacolod ang iya asawa nga OFW sa Dammam, Saudi Arabia bangud nagabalati-an ini didto sa karon.
Nakilala ang amo nga Overseas Filipino Worker nga si Jennylyn Alarcon Escosa, 36 anyos ang edad, taga-Brgy. Mansilingan, Bacolod City kag yara karon sa Saudi Arabia naga-trabaho.
Suno sa bana ni Jennylyn nga si Alberto Escosa, 40 anyos, naglakat sa Dammam ang iya asawa sadtong March 3, 2018 agud magtrabaho bilang domestic helper.
Apang ini ang nagbalatian didto, na over-fatigue bangud man sang madamo niya nga trabaho kag halos wala sang pahuway gani nagdesisyon ini nga magpauli na lamang kuntani.
Pahayag ni Alberto nga sang una naka contact pa ang iya asawa sa iya kag nakasugilanon sila angut sa iya indi maayo nga kahimtangan didto, apang sang ulihi, wala na ini naka tawag bangud ginkuha na sang iya amo ang iya cellphone.
Sa karon ang naga-update na gid lamang kay Alberto angut sa sitwasyon sang iya asawa amo ang ila kaingud diri sa Bacolod nga didto man karon naga trabaho sa Dammam malapit kay Jennylyn.
Nahibaluan nga ginapunggan si Jennylyn sang iya amo nga magpauli diri sa Pilipinas, rason nga nagapangayo ini karon sang bulig partikular sa agency nga nagpalakat sa iya didto nga amo ang First Personnel Services Agency./dyHB BACOLOD
