GIN-ALIGAR NA DEPRESS nga bana ang nagsaka sa tower sang National Grid Corporation of the Philippines (NGCP) nga nagataas sang 100-150 feet subong nga adlaw sa Prk. Paraiso, Brgy. Mansilingan syudad sang Bacolod.
Kapin sa lima tubtob anum ka oras nga ini ang nagtiner sa ibabaw sang tower, apang sa pag negosyar sang mga rescue group kag pamilya sini, ini ang nagpanaog pasado las kwatro subong nga hapon.
Ginkilala ang amo nga lalaki kay Ives Pelowa, 32 anyos may asawa kag duha ka menor-de-edad nga kabataan sang Cabugwason, Brgy. Mansilingan syudad sang Bacolod.
Si Pelowa ang nagsaka sa tower sang NGCP mga takna las 10 sang aga, Enero 29 bangud nga ini ang na depress matapos ginbayaan sila sang iya nga asawa.
Nag desider si Pelowa nga manaog matapos nga nakita sini ang apat ka tuig nga bata nga nagahilibion kag utod sini nga naga engganyo sa iya nga manaog sa amo nga tower.
Gindala naman sa talatapan ni Punong Brgy. Boy Pico sang Brgy. Mansilingan si Pelowa para sa pagpakighinun-anon upod sa pamilya kag didto nga may ginsurender si Pelowa nga isa ka sachet sang ginapatihan shabu nga naga balor sang 50 ka libo ka pesos nga gin turn-over naman sa Police Station 7.
Nahibaluan nga ini ang napriso man sadtong tuig 2017 kag nakaguwa sang Abril 2019 sa kaso nga iligal nga druga.
Si Pelowa ang yara sa karon sa paghinakop sang Police Station 7 kag ini ang plano nga iga pa-rehab.
[image: image.png]
