CADIZ CITY, NEGROS OCCIDENTAL – Ginpasaka na ang kaso nga parricide sini nga adlaw batuk sa isa ka bana nga nagpatay sang iya kaugalingon nga asawa kahapon sang kaagahon sa ciudad sang Cadiz.
Ang kaso ginpasaka batuk sa suspek nga si Jose Hermalin, 70 anyos, bangud sang iya pagpatay sa iya asawa nga si Violeta, 64 anyos, lunsay pumuluyo sang Brgy. Luna, Cadiz City.
Base sa imbestigasyon sang Cadiz City Police Station, ang insidente natabo kahapon sang kaagahon kon diin ginpatay sang suspek ang iya asawa gamit ang wasay samtang nagakatulog ang biktima.
Nag-angkon sang pilas sa idalum sang iya baba si Violeta nga naglab-ot tubtub sa iya li-og nga amo naman ang gintunaan sang iya kamatayon.
Suno sa police, ang suspek ginaalegar may diperensya sa iya pamensaron kag may record sa ila lugar nga nagapangkuha sang gamit nga indi iya.
Samtang may pila man ka impormasyon nga nabaton ang utoridad nga posible ang isa sa motibo kon ngaa ginpatay sang suspek ang iya asawa amo nga naugot ini kay ginataguan siya kwarta sang biktima.
Detained na karon sa custodial facility sang Cadiz City Police Station ang suspek/dyHB BACOLOD
