Davao City – Napukaw ang atensyon sa RMN DXDC News Team sa kahimtang sa usa ka amahan nga nagmasakiton ug iyang duha ka mga anak nga nakipuyo sa bakanteng gambalay sa kanto Legaspi ug Bonifacio ning syudad sa Davao.
Sumala sa usa ka alyas Allan, 50 anyos, amahan sa duha ka mga menor de edad, nga bugtong gamay’ng kita niini isip car watch boy maoy iyang gisuporta sa iyang duha ka mga anak aron lang dili magutman matag adlaw.
Matud sa amahan nga nanglimbasog siya bisan ug aduna siyay gibati sa kalawasan aron lamang dili magutman ang iyang duha ka mga anak nga matud pa dili na dawaton sa inahan kun muipon pagpuyo sa ilang panimalay.
Gidugang ni alyas Allan nga dili na musugot ang iyang asawa nga muipon pa sila og puyo tungod kay aduna napud kini laing kaipon nga lalake sa ilang gipuy-an.
Makita sa hulagway nga gi-drawing pa sa duha ka menor edad ang ilang pamilya sa nilabay nga karton.
Nanghinaot ang amahan nga adunay malumong kasing kasing nga makatabang sa ilang kahimtang ilabina sa duha niya mga anak ingun man ang gipamati niining sakit sa bat-ang ug pus-on nga maoy nakapahugno sa iyang panglawas.
RadyoMaN Erin Lumosbog
