BAGO CITY – (2nd Update) Igapaidalum sa autopsy ang bangkay ni Dr. Felix Valenzuela agud matumod kon bala may foul play ukon wala sa iya kamatayon.
Suno sa Medico legal officer sang SOCO nga si Dr. Major Edquilla nga sa karon wala pa sila sang may mahatag nga impormasyon sa kamatayon sang doktor, ano ang motibo kag kon bala ano nga sahi sang armas ang gin-gamit.
Ini kasunod nga intact gihapon ang gamit ni Dr. Valenzuela, wala nadula ang iya sini wallet, kwarta kag iban pa nga importante nga mga kagamitan sa sulod sang iya salakyan.
Ang bangkay ni Valenzuela ang nasapwan sang mga residente sang Purok Aki, Km 15, Calumangan, Bago City pasado las 6 kaina sang aga.
Madumduman nga ginpahayag sang mga pumuluyo sang amo nga lugar, nga mga las 4 pa sang hapon kahapon nga ila nakita nga nakaparada ang Hyundai i10 nga salakyan sang biktima kag natingala sila nga tubtub las 6 sini nga aga yara gihapon sa lugar ang salakyan.
Bangud sini, ginpalapitan sang mga tawo ang salakyan kag sang ila ginlantaw, didto kag ila nakita ang doktor nga may pilas sa dughan kag wala na sang kabuhi.
Si Dr. Valenzuela ang utod sang anay Liga ng mga Barangay President, Punong Barangay sang Barangay Estefania, Bacolod City nga si Dado Valenzuela.
Ang bangkay sang doktor ang gindala sa Bacolod Rolling Hills Memorial Chapel.
