ISABELA, NEGROS OCCIDENTAL – Patay ang isa ka soltero matapos nga ini siya ang ginbuno sang iya man lamang kaupod sa inom kagab-i bangud sang indi paghangpanay sa Brgy. Cansalongon, banwa sang Isabela.
Nakilala ang biktima nga si Junval Savillo, 19 anyos ang edad, soltero, isa ka mangunguma kag pumuluyo sang Sitio Canlusong, Brgy. Cansalongon, Isabela, samtang ang suspek naman ginkilala kay Bernie Abrenica, 33 anyos ang edad, single kag residente man sang amo nga lugar.
Suno sa pagpangusisa sang Isabela Municipal Police Station nga mga las 11 kagab-i, samtang nagalakat ang duha pauli sa ila balay halin sa ilimnan, ini sila ang naglalisay.
Bangud sang ila mainit nga pagbayluhanay sang mga tinaga, hinali na lamang nga ginbuno sang suspek ang biktima kag naigo ini sa likod nga bahin sang iya lawas nga nagresulta naman sang iya kamatayon.
Natigayon nga maaresto ang suspek pagkatapos nga nagpatigayon sang hot pursuit operation ang mga katapo sang Isabela PNP./dyHB BACOLOD
