CAUAYAN, NEGROS OCCIDENTAL – Nabun-an ang isa ka soltero matapos nagluntad ang rambol sa isa ka bilasyunan kaina sang kaagahon sa Brgy. Bulata, Cauayan.
Nakilala ang biktima nga si Eddie Sanghu, 30 anyos ang edad, single kag residente sang Purok 7, Brgy. Bulata, samtang ang mga suspek naman ginkilala nga sanday Michael Deniega, 27 anyos, Jamarie Deniega, 23, lunsay single kag tanan pumuluyo sang Purok 7, Brgy. Bulata subong man si Jolito Sanchez, 31, single kag residente sang Sitio Pantag, Brgy. Bulata.
Suno sa imbestigasyon sang Cauayan Municipal Police Station, natabo ang insidente may mga las 2:15 kaina sang kaagahon sa bilasyon sang napatay nga si Ancelma Arca sa amo nga lugar.
Ginpahayag nga samtang nagahampang sang pusoy ang mga suspek kag ang biktima, ini sila ang naglinalisay nga nagresulta sang rambol.
Ginaalegar nga ang biktima ginbuno sang suspek nga si Michael Deniega kag ini ang nag-angkon sang duha ka pilas tuga sang buno sa idalum sang wala niya nga kamot.
Gilayon nga gindala sa Mercedita Montilla Hospital ang biktima samtang ang mga suspek naman yara na karon sa kustodiya sang Cauayan Municipal Police Station./dyHB BACOLOD
