Nabas, Aklan – Dead on the spot matapos nga bun-on ag eab-on ro sangka barangay tanod it anang nakaaway kahapon it hapon sa Sitio Molada, Brgy. Rizal, Nabas, Aklan.
Nakilaea rong biktima kay Reynaldo Tatoy y Manhito alyas “Ikoy”, 44-anyos, samtang rong mga ginaturong suspek hay ro mag-amang sanday Ricardo Drio y Colindon, 40-anyos; Brando Drio, 21-anyos ag Banjo Drio, 22-anyos tanan residente man it nasambit nga lugar.
Sa imbestigasyon it Nabas PNP na nagahampang it pool rayang si Reynaldo ag ro anang unga kaibahan si Ricardo tag makaangkon it uwa pagka intindihanan ag mainitang diskusyon.
Una nga gumabot it sanduko rong biktima dungan eabo kay Ricardo nga inigo sa abaga ag likod.
Tag makita raya ko unga ni Ricardo nga si Brando hay anang ginhakos ro biktima ag gintueop sa kilid.
Insigida nga gindaea sa Caticlan Baptist Hospital si Ricardo ag ko ulihi gin transfer daya sa Aklan Provincial Hospital nga naka hospital arrest sa makaron samtang si Reynaldo hay ginbawian it kabuhi sa lugar mismo it krimen bangud sa grabeng mga tama.
Sa pihak nga parte sa pakikipag-angot mat-a it RMN Kalibo kay Ricardo ana kara nga gin ako nga imaw rong naka patay sa biktima ag uwa it kahilabtanan ro ana daywa ka unga.
Suno kana nga gin unahan imaw it eabo ko biktima ag ko ulihi nahaagaw nana ro sanduko it biktima ag ginbuno na it daywang beses ag linabo it sang beses sa ueo.
Matapos raya suno kana hay gumuwa imaw sa ginahampangan ag nahasub-eang nana si Banjo ag gin agaw kana rong sanduko ag hinaboy sa magamo.
Sa pagresponde it Nabas PNP ag SOCO-Aklan sa lugar naaresto sanday Brandon ag Banjo, narecover man rong sanduko nga gingamit sa krimen nga nagahaba it 60 cm kaibahan rong tagob ag pueo.
Nasayuran nga may sanduko rong bikitma bangud nga ana rayang gina gamit sa eanas, sa pagsaka it niyog ag sa pagpangahoy.
Si Brandon ag Banjo hay detained sa lock up cell it Nabas PNP ag nakataeana nga iga inquest makaron nga adlaw.
