Makato, Aklan – Daywa rong haeab-an kahapon it hapon sa Sitio Eomapad, Brgy. Tina, Makato, Aklan bangud sa dating away ag makaangkon it mainitang diskusyon sa sangka birthday. Rong mga biktima nakilaea kanday Marlon Paderan ag Erwin Pastrana, tanan sa hustong edad samtang rong suspek hay nakilaea man kay Wayne Jay Ibabao tanan residente it nasambit nga lugar. Suno kay PSSgt. James Padasas it Makato PNP naguwa sa andang imbestigasyon nga kahapon it hapon hay naga inum-unum ro nasambit nga mga persona sa sangka birthday ag ko ulihi hay naka angkon it maitinang diskusyon rong sambilog sa kaibahan ko mga biktima nga si certain “Jerick” ag ro suspek. Bangud nga nagkainitan hay ginpauli rayang suspek ag si certain Jerick pero lipod sa andang paghisayod hay bumalik rong suspek nga may daeang sanduko linabo si Paderan nga inigo sa waeang abaga ag siko. Samtang si Pastrana hay naninahan man sa waeang tuhod matapos nga nag-ampra sa suspek ag kay Paderan. Matapos rong pagpang eabo hay gindaea sa hospital rong mga biktima ko nag responde nga mga miyembro it MDRRMO Makato samtang rong suspek hay naaresto man eagi ko mga kapulisan ag naka kulong makaron sa lock up cell it Makato PNP ag pagapasakaan it kasong frustrated homicide. Nasayuran nga rayang si Paderan ag Ibabao hay may dating alitan bangud nga linagas man it kutsilyo ni Paderan si Ibabao.
