Tapaz, Capiz- Tatlo ka mga persona ang nagkaladakpan bangud sa ilegal nga naga-extract sang grabas sa Barangay Garcia, Tapaz, Capiz.
Pinaage sa gintingub nga pwersa sang National Bureau of Investigation(NBI) kag Capiz Provincial Environment and Natural Resources Office (CaPENRO) natigayon nga maarestar sanday Eleuterio Gamayao, 62-anyos; Reymund Gole, 31-anyos kag Abraham Pabayos, 33-anyos ang pang-edaron.
Ang mga ini ang naaktuhan nga naga-extract sang grabas kun sa diin wala sang may nagakaigo nga permiso. Natalana naman nga pasakaan sang kaso nga paglapas sa Philippine Mining Act ang amu nga mga persona kalakip ang ginapahayag amu sang mga ini nga si Ruther Gardose.
Ginkumpiskar man ang duha ka mga dump trucks kag isa ka pay loader nga ginagamit sang mga ini sa ilegal nga operasyon.
Mahibaluan nga sang nakaligad, walo man ka mga persona ang ginangdakop sang Task Force Action Bantay Grabas sa banwa sang Panit-an dala sang mas ginpasangkad nga kampanya kontra illegal quarry operation.
photo © CaPENRO
