Ginpasakaan na sang kaso nga paglapas sa RA 3019 ukon Anti-Graft and Corrupt Practices Act ang punong barangay, empleyado sang Department of Social Welfare and Development (DSWD) kag isa ka sibilyan sa banwa sang Isabela bangud sang alegasyon sa anomaliya sa tagtaganay sang Social Amelioration Program (SAP).
Ini ang gin-confirm ni Negros Occidental Police Provincial Office (NOPPO) Director Colonel Romeo Baleros matapos ang tatlo ka adlaw nila nga imbestigasyon.
Suno kay Baleros, isa ka residente ang nagreklamo batok sa Punong Barangay, sa DSWD personnel kag isa ka sibilyan matapos nga ginhatagan sang SAP ang duha ka indi man kwalipikado nga benepisyaryo.
Ginpahayag ni Baleros nga ang duha ka indi qualified benefeciaries amo ang 13-anyos nga hinablos sang kapitan nga naga-istar sa iya balay kag isa niya ka himata nga natawo sa Isabela apang sa Brgy. Maao, Bago City na karun naga-istar.
Pahayag pa sang NOPPO director, ginreklamo ang tatlo bangud nga madamo man kuntani nga qualified SAP benefeciaries sa amo nga barangay, apang wala nahatagan sang ayuda sang gobyerno.
[image: image.png]
