Usa ka Barangay Kagawad sa Cagayan de Oro ang nagpakitang gilas sulod sa walo ka adlaw nga aksyon sa 25th Abu Dhabi Chess Festival nga natapos niadtong Miyekules didto sa Abu Dhabi, United Arab Emirates.
Nakuha sa 35 anyos nga si Barangay 23 Kagawad Jaime Joshua A. Frias II ang ikaduhang pwesto sa best unrated player sa open section.
Tungod niini, nadawat ni Frias ang customized trophy, medal nga gikan sa Italy ug ang cash prize nga 700 US dollars kun 37-mil pesos.
Si Frias nga usa ka kanhi Kapitan sa Barangay 23 nakakuha og unom ka puntos sulod sa siyam ka round.
Usa ka Pinoy ug OFW gihapon ang nakakuha sa unang ganti nga nihuman og 6.5 puntos ug nakadawat sa trophy, medalya ug one thousand US dollars o 53-mil pesos.
Matud ni Kagawad Frias nga ang torneyo giapilan sa kapin 500 ka players gikan sa lain laing nasud sa kalibutan.
Dugang niini, gipasalamatan usab ni Frias sila Kapitana Gilda Go sa Barangay 21 ug kanhi Nazareth Barangay Chairperson Bebot Rodriguez sa ilang suporta ingon man si Jobannie Tabada, usa ka OFW sa Dubai.
