BACOLOD CITY – Goodnews naman sa mga barangay police ukon Barangay Tanod sa syudad sang Bacolod matapos nga gin-aprubahan sa Sangguniang Panlungsod ang 2 mil pesos nga allowance kada bulan.
Sarang makabaton sang monthly allowance ang mga barangay tanod nga maka-render sang ila serbisyo ukon auxiliary duties sa ila mga respective police station ukon depende sa ihatag nga assignment sang Public Order and Safety Office (POSO).
Suno sa author sang amo nga ordinansa, Councilor Cesar Distrito nga tuman ka importante sang papel sang mga barangay tanod sa pagpabilin sang kalinong kag katawhayan sang syudad, gani naka-igo lang nga hatagan sila sang dugang nga insentibo.
Dugang pa ni Distrito nga may yara naman sang requirements kag qualifications ang pagakuha-on nga mga tanod lakip diri nga dapat naka-trabaho na bilang barangay police sang indi mag-nubo sa duwa ka tuig, napa-idalum na sa self-defense training and basic law enforcement seminar, dapat physically fit kag naga-edad sang 18-60 years old.
Ang mga qualified nga barangay tanod ang sarang maka-upod sa roving and patrol operations sang ila nasakpan nga police station, sarang maka-assist sa traffic management, pwede man sila ma-assign sa maga-bantay sa mga public schools ukon mga lugar nga may yara sang mataas nga kaso sang krimen.
Kinahanglan naman nga mag-duty ang mga qualified nga barangay police sang at least 72 hours sa sulod sang isa ka bulan samtang wala naman diri na-lakip ang ila regular nga duty sa ila tagsa-tagsa ka barangay.
Ang ini nga ordinance ang may inisyal nga pondo nga kapin sa P2 million pesos.
