Nabas, Aklan – Dead on arrival sa hospital ro sangka barangay tanod matapos nga magtuhaw rong kumosyon ag habun-an raya kaina it aga-aga sa Brgy. Buenasuerte, Nabas, Aklan.
Nakilaea rong biktima kay Jerol Isturis y Lopez, 51-anyos samtang rong mga suspek nakilaea kanday Jose Pring Ascaño, 28-anyos; Jaithor Ascaño, 20-anyos ag Melchor Ascaño, 21-anyos tanan residente it nasambit nga lugar. Sa pakikipag-angot it RMN DYKR Kalibo kay PCInsp. Gerick Vargas, hepe it Nabas PNP nga nakabaton sanda it tawag halin sa lugar nga may una nga kumosyon.
Pag-abot sa lugar kaibahan ro MDRRMO Nabas, nakita nanda nga nagahamyangon rong biktima ag may naga ungot nga pana sa dughan, ag rayang si Jose Pring hay may tama man it pag-eabo sa ueo ag alima, ag ro unga it biktima nga si Jerome Isturis, 29-anyos nga may mga lastro sa alima.
Sa imbestigasyon naga guwa nga kaina it mga alas 3:35 ro aga-aga hay nakabati rong mag-ama nga si Jerol ag Jerome it eagapok sa andang bubong nga matsa ginbaearing.
Anda nga ginguwa ag gin usisa ay basi nga may nagapanakaw it manok. Sa andang paguwa nakita nanda rong grupo it suspek nga una sa kilid karsada naga hueat it truck it mga gulay ag anda ginkutana kon may nakita nga ibang tawo ag nag sabat ra sanda nga uwa it nakita.
Bumalik rong mag-ama sa andang baeay para nga magkatueog it uman pero makataliwan ro pilang minuto hay nakabati eoman sanda it sunod-sunod nga eagapok sa andang bubong.
Anda eoman nga gintan-aw ag nakita nanda rong tatlo nga nagapaeangop sa andang baeay nga may bitbit nga batao, dali-dali nga nagpahaum it sanduko ag indian target rong biktima para kunta nga pamaeag sa tatlo.
Kumo imaw barangay tanod ana anay nga gin abangan rong tatlo para nga indi eon magpadayaon ugaling rayang tatlo nagpadayon, ginsamad nanda rong kurae it biktima ag dikato eon nagkagulo ag nahabun-an it pana ro biktima nga anang ginkamatay.
Sanday Jaithor ag Melchor hay nagbulig man para nga ma commit rong krimen.
Sa makaron hay gina determina pa it Nabas PNP kon rong pana nga ginbuno sa biktima ag ro tama it pag eabo kay Jose Ping hay kon halin man sa sanduko it biktima.
Si Jaithor ag Melchor hay detained sa lock up cell it Nabas PNP samtang si Jose Ping hay naka hospital arrest sa Aklan Provincial Hospital.
Kasong Murder ag Physical Injuries rong kaso nga ginaprepar it kapulisan.
Ginapanan-aw nga motibo hay bangud sa mga dating away.
