BAWAL? | Ordinansa nga nagabawal sa paggamit kag pagkabit sang mga banderitas nga human sa plastic sa bug-os nga probinsya, ginaduso ni BM Martinez

114

CAPIZ – Igaduso ni Board Member Eleuper “Bulilit” Martinez ang ordinansa sa probinsya nga magabawal sa paggamit kag pagpakabit sang mga banderitas nga human sa plastic sa tion sang mga kapistahan (An ordinance totally banning the use of plastic bunting and Pennants during fiestas and other special events in the province of Capiz).
Sa ginpatigayon ng committee hearing sang Committee on Environment sang Sangguniang Panlalawigan nga ginapamunuan ni BM Martinez ginpahayag sini makahalalit kag maka-epekto sa palibot ang mga plastic. Bangud sini luyag nga mapahagan-hagan sang board member ang paggamit sang mga plastic buntings kag pennants sa tion nga may ginasaulog nga mga kapistahan sa bug-os nga probinsya sang Capiz.
Suno kay Martinez, nga madamo pa sang iban nga materyales nga sarang magamit bilang mga sa baylo nga plastic. Ginhatag sini nga ehemplo amo ang tela nga mahimo pa nga magamit liwat sa masunod nga mga kapistahan.
Katuyuan sang nasambit nga ordinansa nga makabulig sa pag-amlig sang palibot. Ginalauman naman nga talakayon sa session sang Sangguniang Panlalawigan ang nasambit nga ordinansa. Nagtambong man sa nasambit nga committee hearing ang mga sangguniang bayan members sa kabanwahanan nga naga-uyat sang Committee on Environment.

Facebook Comments

From Advertisers