BACOLOD CITY – (2nd Update) Kilala kag sikat nga artist sa Bacolod City kag madamo sang nabulig sa mga programa sang Barangay Granada ang pagkilala sa biktima nga ginbuno kag napatay sang isa ka suspek nga buot kuntani magpangawat sa iya balay kaina sang kaagahon.
Ginpahayag ni Brgy. Granada Punong Barangay Alfredo “Itik” Talimodao nga kilala gid niya ang biktima nga si Nunistell Mae Fulo, 41 anyos, bangud ihada niya ini sa kasal kag daku ang iya sini nangin kontribusyon sa mga programa sang barangay.
Si Nunistell, may duha ka mha kabataan sa iya bana nga foreigner, ang nagtapos sang Bachelor of Fine Arts Major in Advertising sa La Consolacion College (LCC) diri sa Bacolod City kag isa ka kilala nga painter kag performing artist sa ‘Artistika’.
Isa man ka anay dance performer ang biktima kag miembro sang ‘Bayanihan’ – ang national dance company sang Pilipinas.
Ang biktima ang napatay matapos nga ginbuno sang halos 13 ka beses, upod ang timbang nga ara subong sa ospital nga si Mary Grace Mupada, sang suspek nga nagbuko mangawat sa iya balay pasado las 6 kaina sang aga sa Purok 5, Brgy. Granada.
Nakilala ang suspek nga si Sandy Sevilla, 27 anyos ang edad, tumandok sang Brgy. Buenavista, Escalante City kag temporaryo nga naga-puyo sa Had. Carmen, Brgy. Granada upod ang iya live-in partner kag duha ka mga kabataan.
Sa pihak nga bahin, ginpahayag naman sang live in partner sang suspect nga si Darren Bernal, 27 anyos, nga kahapon pa sang nag-aga naghalin sa ila balay si Sandy kag naglisensya nga ini ang magalakat agud magkuha sang iya sweldo.
Natingala man siya suno kay Darren nga wala nakapauli si Sandy tubtub kagab-i, kag sang ini ang nag-abot gid man kaina sang aga sa ila balay, nagtu-ad ini sa iya asawa nga may ginsulod siya nga balay upod ang duha ka iban pa, sa diin ang isa taga-Victorias.
Wala na sang iban pa nga nasugid si Sandy sa iya, suno kay Darren bangud nga nag-abot na ang police agud dakpon ang suspek./ Photos from her Facebook
