BACOLOD CITY – Ginaduso sang mga manugbaligya sang bulak sa Bacolod City Public Plaza nga antes sila kuntani isaylo sang ciudad may klaro kag pat-ud na nga lugar nga pagasayluhan sa ila.
Suno sa presidente sang asosasyon sang flower vendors sa plaza nga matapos sang ila meeting, natunga sa duha ang luyag sang mga manugbaligya, may yara nga kumporme nga sa kilid sang BAYS Center sila isaylo kag may yara man nga gusto sa vendors plaza sila i-relocate.
Reklamo sang mga vendors nga wala gid sila anay ginkonsulta antes pa man nahuman ang desisyon nga sayluhon ang ila balaligyaan sa iban nga lugar kaangay sang Bays Center sa diin wala sang kahoy kag madasig naman nga gakalayong ang ila bulak bangod wala sang pasilungan.
Gina-finalize pa sa karon sang ciudad sang Bacolod ang isa ka mas maayo nga lugar para sa mga flower vendors ukon manugbaligya sang bulak sa Bacolod City Public Plaza agud nga indi sila madulaan sang pwesto nga mabaligyaan.
Ini ang rason suno kay Bacolod City Legal Officer Joselito Bayatan kon nga-a maatrasar ukon indi anay madayon ang pagsaylo sang mga flower vendors halin sa public plaza pakadto kuntani sa isa ka site sa kilid sang Bacolod Arts and Youth Sports (BAYs) Center.
Suno kay Bayatan nga antes sayluhon ang mga manugbaligya sang bulak dapat pa anay unahon nga asikasuhon ang mga food vendors ukon manugbaligya sang pagkaon nga amo sa karon ang naga-okupar sa lugar nga pagasayluhan sang mga flower vendors.
Sa bahin sang mga food vendors sa kilid sang Bays Center, naga-problema man sa karon ang mga ini bangud nga kon isaylo sa ila lokal ang manugbaligya sang bulak, sila naman ang madulaan sang ma-pwestuhan.
Sa pihak nga bahin, ginaklaro ni Bacolod City Administrator Atty. John Orola nga indi na sila magsugilanon pa sa mga flower vendors bangud ini ang nakasugtan na sang damlag pa./dyHB BACOLOD
