Wala sang kontrata, verbal gid lamang kag kon ano ang nabaligya nga ticket, amo lang ang bayaran sang Bacolod City Police Office (BCPO).
Ini ang ginklaro ni BCPO Deputy Director for Administration Pol. Lt. Col. Levy Pangue angut sa nangin kontrobersyal nga issue sang basketball game sa tunga nila sang mga artista sang Ang Probinsyano kon diin nagkadto sa programa ni Ben Tulfo ang organizer sini kag nag-akusar nga wala sila nabayaran.
Sa isa ka press conference nga ginpatigayon subong nga adlaw sa BCPO upod kay Councilor Al Espino, ginsiling ni Pangue nga una nagkadto kay City Director Col. Henry Biñas ang organizer sang amo nga basketball game nga nagpakilala kay Rorry Lumba kag nagtanyag nga magabulig para sa programa sang pulis pinaagi sa paghiwat sang amo nga event.
Suno kay Pangue nga sa iya gintugyan sang city director ang pagsugilanon kay Lumba tubtub nga may nahuman sila nga transaction kag natigayon ang hampang kon diin ang ila arrangement amo nga kon ano lang ang mabaligya nga ticket amo lang ang bayaran sang BCPO.
Pahayag ni Pangue nga nakabayad na sila sa organizer sang kapin 401,090 pesos nga naghalin naman sa ticket nga nabaligya sa mga katapo sang BCPO kag kita sa nabaligya nga ticket sa venue.
Sa bahin ni Coun. Al Espino ginsiling ni Pangue nga ila ini ginpalapitan bangud man nga siya ang chairman sang Committee on Police Matters kag isa ini ka daku nga event gani nagpangao sila sang bulig.
[image: image.png]
