BACOLOD CITY – Ginabulubanta nga nagdangat sa kapin P3 million pesos ang balor sang suspected shabu nga narecover halin sa 2 ka mga suspek sa ginpatigayon nga buy bust operation kagab-i sa Purok Bangrus, Brgy. 1, Bacolod City.
Nakilala ang mga suspek nga sanday Rica Mitch Villalon, Alyas Teptep, legal ang edad kag si Reydan Palomero, Alyas Kano Talisay, may legal man ang edad.
Ang buybust operation ginpatigayon sang mga katapo sang City Drug Enforcement Unit (CDEU) kag sang Police Station 1 sa Purok Bangrus, Brgy. 1, Bacolod City may mga las 8 kagab-i.
Sa amo nga buybust na-recover sa mga suspek ang kapin 260 ka gramos sang suspected shabu kag P5 mil pesos nga marked money lakip na ang 2 ka deposit slips sa BDO nga nakapangalan sa naga-apelyedo Poja.
Ginasiling nga ang mga nadakpan ang supplier sang Poja drug group sa Bacolod.
Sa pihak nga bahin, base sa intelligence report nga nakuha sang Bacolod City Police Office, ang supply sang shabu nga nagasulod sa Bacolod City ang naghalin pa sa Cebu.
Samtang ang druga naman nga nagalab-ot sa probinsya sang Iloilo ang naghalin naman diri sa ciudad sang Bacolod./ Donard Alimpolo photos/ DYHB RMN
