Davao City – Gikumpirma sa Bureau of Fire Protection (BFP) nga mi-ubos kun mikunhod ang ihap sa insidente sa sunog sa syudad sa Davao karong tuiga kung itandi sa milabay nga tuig.
Sa interbyu sa DXDC RMN Davao kang Senior Fire Officer (SFO) 3 Ramil Gillado, hepe sa intelligence and investigation section sa BFP-XI, gibutyag niini nga anaa sa 111 ka fire incidents ang natala gikan sa Enero hangtud sa Pebrero sa milabay nga tuig, 2019 diin mas ubos kini sa 80 ka insidente sa sunog gikan Enero hangtud Pebrero karong tuiga.
Gipasabot ni Gillado nga katunga sa ihap sa fire incidents karong tuiga gikonsiderang structural samtang ang katunga gitawag nga non-structural kun non-significant fire incidents. Dugang niini nga nagbaton na og igong kahibalo ang publiko sa paglikay sa sunog tungod sa kampanya sa kabomberohan.
“Kung mapansin nato ang mga latest fire incidents diri sa Davao City. Naa tay mga pag responde nato is pag abot sa area na kontrol na siya o na-fire out na. Nindot ni siya nga sign nga development sa atong community tungod sa atong gibuhat nga Oplan Ligtas Pamayanan,” saysay ni Gillado.
Nasayran nga gikonsiderang Fire Prevention Month ang bulan sa Marso apan gipasabot ni Gillado nga angay nga ikonsidera ang matag adlawa isip Fire Prevention Day.
RadyoMaN Kirby Manzon
