Davao City – Natumbok na sa 6th Infantry Division Philippine Army ang grupo nga anaa sa likod sa pagpamomba sa lungsod sa Isulan, Sultan Kudarat kung asa duha ang patay ug anaa sa 36 ang samdan kagabii.
Suma ni 6th ID Spokesperson Captain Arvin Encinas nga base sa ilang gihimong pagpanubay nasuta nga duha ka suspek nga maoy nagbilin sa bag nga dunay unod nga IED sakop sa Bangsamoro Islamic Freedom Fighters.
Matud ni Encinas nga posibli target sa mga suspek pabuthon ang IED sa mga sundalo ug CAFGU nga naghatag og siguridad sa kalihukan sa lungsod isip kabahin sa atake sa tropa sa gobyerno.
Dugay na matud pa namonitor sa kasundaluhan ang plano sa mao nga grupo nga mamomba sa pipila ka dapit sa Central Mindanao apan aminado ang tigpamaba nga nalutsan gayod sila sa mga suspek kagabii.
Sitahon na unta sa nagpatrolya nga kasundaluhan ang mga suspek gumikan sa kadudahan nga lihok apan kalit na lang midagan ang mga suspetsado ug gibilin ang dala nga bag.
Busa gisuwayan kini og gukod sa CAFGU ug pila ka minuto kalit mibusikad ang IED sulod sa bag mao nasamdan ang nasangpit nga CAFGU.
Apan giklaro sa opisyal nga wala nagpasagad ug nagkuwang ang militar sa paghatag og igong seguridad nunot sa gipahigayong dakong aktibidad sa lungsod kagabii.
Gumikan sa panghitabo, mas gipahugtan na karon sa militar ang siguridad sa tibuok area of responsibility sa 6th ID aron masiguro ang kaluwasan sa katawhan gikan sa mga terorista.
RadyoMaN Joel Viray
