RMN Laoag – Inarak ti naruay a bisita nga immay immatendar iti panaglukat ti kabbaro nga atraksyon ti ‘Bike ken Surf Zipline’ iti ili ti Vintar, Ilocos Norte.
Daytoy ket programa ti lokal a gobyerno tapnu mangipaay nayon a pagpasyaran ken tulong kadagiti negosyante iti nasao a lugar. Ti nasao a proyekto ket aggatad ti sangapulo a milyon a pisos manipud ti pondo iti munisipyo.
Segun kenni Ilocos Norte Tourism Officer Aian Raquel, daytoy ti kaunaan a Bike-line iti Ilocos Region, ket saanen nga umadayo tapnu maeksperyensa daytoy. Dakkel pay nga opportunidad daytoy tapno maipakita ti nabaknang a kultura iti Ilocos Norte.
500 pesos tunggal pasahero nga aglugan iti biseklata a dumalyasat iti 270 a metro a kaatiddog a zipline. Adda pay sabsabali a land ken water adventure kas iti 4×4 ATV, Kayak, Hydra cycle, ken dadduma pay.
Ti Ilocos Norte ti paborito a pagpasyaran tunggal ‘Summer Season’ gapu kadagiti nagpipintas nga atraksyon kas iti baybay, sand dunes, sunflower farm, windmills farm ken dagiti agkakauna wenno antigo a simbaan.
Malaksid kadagitoy, saan met a mapukaw iti listaan dagiti turista dagiti agkakaimas a makan nga aramid a mismo dagiti Ilokano.
Bernard Ver, RMN News
