Kalibo, Aklan – Padayon makaron nga ginabueong sa Aklan Provincial Hospital rong sangka binatilyo matapos nga mabun-an kaina it aga-aga sa Brgy. Estancia, Kalibo, Aklan.
Rong biktima nakilaea kay Niño John Sobusa Bautista, 19-anyos ag residente man it nasambit nga lugar.
Sa inisyal nga imbestigasyon it Kalibo PNP naga guwa nga sanday Shane Joy, 14-anyos ag Icia-Le, 15-anyos tanan residente man it Estancia hay naga sakay sa motorsiklo nga ginamaneho ni Charles Villaco, 18-anyos it New Washington sa Refulgente Road hay ginsundan ko grupo ni John Lorenzo Villanueva kaibahan sanday Christian Kyle Lachica it Andagao ag Jobert Nadua it Calachuchi Road Andagao.
Pag-abot sa sangka baraka hay nanaog rong grupo ni Shane Joy para kunta magbakae ugaling sanda ra hay ginlibutan ko grupo ni John Lorenzo ag may nagpatunga nga mainitang diskusyon kanda kung sa siin ginhana pa nga bakueon ko grupo ni John Lorenzo si Villaco.
Gin ampara sanda ni Shane Joy ugaling imaw tar o habaywan ni John Lorenzo sa tiyan nga nagtuga it kasakitan kana.
Sa nasambit nga kumosyon rayang si Shane Joy ag Icia Ler hay nagsinggit ag nagpangayo it bulig kung sa siin ro grupo ni Niño John hay nagbulig sa pag-eagas sa grupo ni John Lorenzo hasta nga nakaabot sanda sa may highway ag may nagpatunga eoman nga komprontasyon sa magtimbang nga grupo ag nagresulta sa pagkabuno kay Niño John nga inigo sa ubos it waeang tiyan ag tuong hita.
Matapos ro nasambit nga insidente hay madasig man nga naeagyo rong mga suspek sa indi masayuran nga direksyon.
Samtang rong bitkima hay insigida man nga gindaea sa hospital para sa nagakaigo nga pagbueong.
Sa makaron hay padayon pa rong ginahimo nga imbestigasyon ag follow up ko mga kapulisan angot sa nasambit nga insidente.
