Ginapaabot nga magabukas na ang biosafety laboratory sa Corazon Locsin Montelibano Memorial Regional Hospital (CLMMRH) nga ginpondohan sang city government sang Bacolod sa bulan sang Hunyo kag ginalauman ang madasig nga paguwa sang resulta sang COVID-19 tests.
Sa interview sang DYHB sa medical director sang CLMMRH nga si Dr. Julius Drilon, magadangat sa 150-200 results kada adlaw ang mapaguwa sang laboratory kun ini ang dumalahan sang tatlo ka personnel sa sulod sang walo ka oras nga operasyon.
Apang posible nga magdoble ini kun madugangan ang trained personnel nga maga-operate sang laboratory kag himuon nga 16 oras ang operasyon kada adlaw.
Aminado man si Dr. Drilon nga tuman kamahal ang pagpaidalom sa rapid anti-body test kag RT-PCR test.
P1,000 ang gasto sa isa ka rapid anti-body test samtang minimum nga P3,500 ang isa ka RT-PCR test, apang magadako pa ini kun ma-admit ang COVID-19 positive sa diin kinahanglan siya ipaidalom sa pila ka repeat tests kag dapat man nga bayaran ang mga gingamit sa hospital.
[image: image.png]
