Wala pa nakabaton sang mando ang Philippine Coast Guard (PCG) Negros Occidental para sa untat-byahe sang mga RORO vessels kasunod sang pagsirado sang Iloilo province sa ila borders santo sa Executive Order ni Iloilo Governor Arthur Defensor Jr.
Sa interview sang DYHB kay PCG Negros Occidental commander Lt. Jansen Benjamin, ginpahayag sini nga ang mga pasahero man lang nga nagasakay sa RORO vessels nga naga-dungka sa banwa sang Dumangas ang maapektuhan sang mando ni Defensor.
Nahibaluan nga santo sa panibag-o nga mando ni Defensor, ginahatagan sang tubtob Hulyo 3 ang nga taga-Iloilo nga magtabok na sa probinsiya bangud kun maglapaw, kabigon na sila nga mga locally stranded inviduals (LSI).
Suno kay Benjamin, bisan nga siraduhan anay sang probinsiya sang Iloilo ang ila border sa Negros Occidental partikular sa Dumangas, padayon lang ang mga RORO vessels nga maga-deliver sang mga cargo kag kun may magasakay nga pasahero, kabigon sila nga LSI sa diin pangitaan na sila sang health certificate kag travel authority.
Samtang, padayon pa nga nagahulat si Benjamin sa kun anu ang mangin sistema sa fast crafts nga nagadungka naman sa ciudad sang Iloilo nga indi sakop sa EO ni Defensor.
[image: image.png]
