Pormal nang gipasakaan sa kasong illegal drug pushing kagahapon sa hapon ang usa ka bombero ning syudad sa Cagayan de Oro.
Ang suspek nga si Charlex Khem Tabamo, empleyado sa Bureau of Fire Protection sa Cogon ning syudad nasikop sa drug buy bust operation sa Opol, Misamis Oriental niadtong Martes.
Nakuha gikan sa maong bombero ang usa ka pakite sa gituohang shabu, marked money ug mga drug paraphernalia.
Matud ni Chief Inspector Dennis Flores, Hepe sa Opol Municipal Police Station nga si Tabamo ilang gipasakaan sa kasong illegal drug pushing sa Misamis Oriental Provincial Prosecutor’s Office.
Mahinumduman nga alas 12:30 sa tungang gabie niadtong Independence Day, si Tabamo nga taga Zone 9, Barangay Patag ning syudad nasikop sa San Pedro Beach Resort sa Taboc, Opol, Misamis Oriental pinaagi sa drug buy bust operation.
Gihimo ang operasyon pinaagi sa hiniusang pwersa sa PDEA Region 10, Provincial Drug Enforcement Unit ug Opol Municipal Police Station.
