Dili na mudawat ang Bukidnon Provincial Medical Center kon BPMC ug mga pasyente nga adunay COVID-19.
Ang BPMC mao ang COVID-19 referral hospital sa probinsya sa Bukidnon.
Sa interview sa RMN DXMB Malaybalay ngadto kang Dr. Miguel Antonio Prantilla, ang chief of hospital sa BPMC, gibutyag niini nga anaa na sila sa code red ug dili na sila mudawat ug bag-ong COVID-19 patient tungod kay puno na ang mga beds nga gigahin para sa natakbuyan sa COVID-19.
Matud ni Dr. Prantilla nga adunay 60 ka mga COVID-19 patients ang naka-admit karon sa BPMC, kini sila nakasinati ug mga sintomas sa virus.
Aminado si Dr. Prantilla nga dakong problema kini karon kung aha dad-on ang mga bag-ong pasyente nga makasinati ug sintomas sa COVID.
Nasayran nga sa Bukidnon bugtong ang BPMC lamang ang mudawat sa mga pasyente sa COVID.
Dugang pa ni Dr. Prantilla nga looy ang mga pasyente sa COVID-19 nga kinahanglan dad-on sa hospital tungod kay dili na usab nila pwede e-refer ngadto sa Cagayan de Oro tungod kay daghang pasyente na usab ang NMMC.
Dili usab daw mamahimong pugson nila ug dawat sa BPMC ang dugang mga pasyente tungod kay ma-apektahan usab ang ilang pag-atuman sa uban nga naka-admit sa mao nga balay tambalanan.
