TACLOBAN CITY – Ginpamumusil patay han diri pa makilal-an nga mga suspek an municipal administrator han San Isidro, Leyte kanina han alas 7:20 han aga, May 8, 2019.
Subay han report han Police Regional Office 8, ginkilala an biktima nga hi Levi Mabini, 42 anyos, may asawa, ngan residente ha brgy. Daja Dako, San Isidro, Leyte.
Nagawas ha inisyal nga imbistigasyon han mga otoridad, sakay han ford ranger nga sarakyan an mga suspek han pusilon hi Mabini ha usa nga gasoline station nga gintatag-iyahan ni San Isidro, Leyte Mayor Susan Ang.
Dead on the spot an biktima.
Samtang, naigo gihapon hin bala han pusil ha tiil hi Jea Itang, 19 anyos ngan hi Joseph Misa 28 anyos nga nakadalagan pasakob ha panimalay ni Mayor Ang nga harani la ha ira gasoline station.
Gindara na an mga samaran ha Ormoc City Hospital.
Ginpapanginano na yana han mga kapulisan kun election related an nasabi nga insidente.
