Kalibo, Aklan – Arestado sa ginpatigayon nga entrapment operation kahapon rong sangka 26-anyos nga eaeaking bugaw it mga menor de edad.
Natigayon imaw nga maaresto matapos nga magdaea it daywa ka mga babaye sa sangka lodge kung sa siin idto naga hueat rong asset it mga pulis.
Pagbaton nana it ana kunta nga porsyento imaw ra dinakop it mga pulis.
Suno sa nasambit nga bugaw nga kahapon hay una imaw sa andang baeay, pero nag text si certain “Ian” kana nga nagapausoy it mga menor de edad nga babaye ay may mga businessman nga mga taga Boracay rong nagapausoy.
Nagpamalibad imaw suno kana pero nagapilit si Ian ag kilala man nana rason nga nag usoy imaw, ginpick up na ag gindaea sa lodge kung siin idto nagahueat si Ian.
Aminado man rong suspek nga dati pa man nana raya nga ueobrahon ugaling nauntat pag pamanila nana ag hara eoman nauman.
Suno kana uwa man imaw it buyot nga mga babaye, barkada-barkada eang ag kon may naga pausoy hay gina usuyan na.
Samtang base sa nabuoe nga impormasyon it RMN Kalibo sa mga kapulisan nga ko last year pa kunta ra imaw ginapaidaeom sa entrapment ugaling may pagkamadanlog sa mga kapulisan.
Sa makaron hay kulong sa lock up cell it Kalibo PNP rong suspek ag magapangatubang it kasong Human Trafficking.
