CAUAYAN CITY – SA KASAGSAGAN NG MATINDING PAGBAHA NA DULOT NG SUPER TYPHOON UWAN, ISANG BUNTIS MULA SA BARANGAY TUNGEL, BAGGAO, CAGAYAN ANG MATAGUMPAY NA NAILIKAS NG MGA HEALTH WORKER NG BAGGAO RURAL HEALTH UNIT (RHU) GAMIT ANG RUBBER BOAT UPANG MATIYAK ANG KANYANG KALIGTASAN AT MAIPAGPATULOY ANG PANGANGANAK.
KINILALA ANG PASYENTE BILANG SI GENERINA B. RESPICIO, 31 ANYOS, NA NASA 39 LINGGO AT LIMANG ARAW NG PAGBUBUNTIS AT NASA AKTIBONG LABOR STAGE.
DAHIL SA HINDI MADAANAN ANG MGA KALSADA PATUNGO SA OSPITAL, AGAD NA NAGRESPONDE ANG RHU-BAGGAO UPANG MAISAGAWA ANG LIGTAS NA PAGLILIKAS.
MULA SA RHU, DINALA SI RESPICIO SAKAY NG AMBULANSYA PATUNGONG BARANGAY BITAG GRANDE BAGO SIYA ISAKAY SA RUBBER BOAT PAPUNTA SA BARANGAY TANANGINET.
DOON, SINALUBONG SIYA NG ISA PANG AMBULANSYA NA NAGHATID SA KANYA SA CAGAYAN VALLEY MEDICAL CENTER (CVMC) PARA SA KINAKAILANGANG MEDIKAL NA ATENSYON.
BAGO ANG PAGLILIKAS, ISINAILALIM MUNA SI RESPICIO SA LABOR MONITORING SA BAGGAO DISTRICT HOSPITAL.
ANG MABILIS AT KOORDINADONG AKSYON NG RHU-BAGGAO AT MGA RESCUER AY NAGPAPATUNAY SA DEDIKASYON NG MGA FRONTLINER SA PAGBIBIGAY NG SERBISYONG PANGKALUSUGAN KAHIT SA GITNA NG KALAMIDAD.
