TACLOBAN CITY – Ginpasakahan ni Samar Police Provincial Director PSSupt. Nicholas Torre hin criminal ngan administrative case ha Office Of The Ombudsman an Mayor han Calbayog City lakip an Vice Mayor ngan mga konsehales han syudad.
Sumala han opisyal, ginpasakahan niya hin kaso nga libel ngan grave misconduct an mga akusado mahitungod han ginpagawas nga resolution nga nagdedeklara ha iya nga persona non grata ha Calbayog dida han nakalabay nga Mayo 21, 2018.
Ha ginpagawas nga resolution han Calbayog City Council, ginmalatumat didto nga waray magtuman an PNP Provincial Director han iya trabaho ngan responsibilidad mahitungod han mga krimen nga nakagdara hin tarhog ngan kadilikaduhan ha mga residente han Calbayog.
Pero pagklaro han opisyal, waray ebidensya ngan basehan nga ginkakaptan an Calbayog City Council para han mga akusasyon nga gindeklara kontra ha iya.
“Ang basehan na kanilang ginamit ay paninirang puri at walang basehan talaga. Walang silang ebidensyang ipinakita man lang at ang kanila ay galit lang sila sakin”
Dugang pa han opisyal, karuyag niya ipakita ha mga kapulisan han Samar Police Provincial Office nga diri mahadlok magbuhat hin maupay bisan pa man daw may gintatalapas nga mga politiko.
Hapagka-yana in padayon an gindudumara nga imbistigayon han Office Of The Ombudsman ha kaso nga ginpasaka han Police Provincial Director han Samar.
