Calinan PNP nagpasalamat sa pagsuporta sa Davaoeños sa Culture of Security

24
Davao City – Mapasalamaton ang Calinan PNP sa Davaoeños sa dali nga pag-report sa usa ka karton nga gituohang adunay bomba nga nahibilin atubangan sa usa ka bakeshop sa Davao-Bukidnon Road, Calinan Poblacion nga miresulta og panic sa publiko ug huot nga dagan sa trapiko kagahapon sa buntag (Mayo 2, 2022).

Sa interbyu sa DXDC RMN Davao kang Police Major Jack Leon Tilcag, Station Commander sa Calinan PNP, gibutyag niini nga gilayong girespondehan sa Davao City Police Office (DCPO), Explosive Ordinance Disposal (EOD) ug Task Force Davao, ang lugar ug gipa-check sa bomb sniffing dog ang unattended
baggage.

Nasuta nga mga sipi sa saging ang sulod sa karton, butang nga gipasalamat sa Calinan PNP ang pag-report gilayon sa awtoridad sa maong kadudahang butang.

“Didto gyud nimo makit-an nga abtik gyud (ang Davaoeños) sa Culture of Security nato. At least, makit-an gihapon nga positive, maayo ang enforcement or campaign nato on Culture of Security,” sulti ni Tilcag.

Nagpahimangno ang kapulisan nga mamahimong masilotan ang kinsa mang muhimo og bomb jokes ug bomb scare subay sa Presidential Decree No. 1727.

RadyoMaN Kirby Manzon

Facebook Comments