Roxas City, Capiz – Indi pa pinal kag mahimo pa nga maligwat ang gin-aprubahan sang Kamara nga isa ka libo ka pesos nga budget para sa CHR ukonCommission on Human Rights.
Suno kay Capiz 1st District Rep. Emmanuel “Tawi” Billones, iga-lobby sini kaupod ang mga kaalyado sa Senado ang paghatag sang nagakaigo nga budget sa komisyon. Sa madumduman nga ginpaboran sang 119 ka mga congressmen ang P1,000 nga pondo para sa CHR kag 32 lamang diri ang nagpamatok kon sa diin kalakip diri si Billones.
Ginpahayag ni Billones nga dismayado ini sa P1,000 pesos nga budget sang CHR. Nagapati ini nga indi mahimo nga dulaon sang Kamara ang Commission on Human Rights (CHR) bangud ini isa ka constitutional office, apang daw kaparehas gid lamang nga gin-abolish ini pinaagi sa indi paghatag sang nagakaigo nga pondo.
Gindugang man sini nga, indi makadihon sang ila katundanan kag obligasyon ang CHR sa tion nga wala sang nagakaigo nga pondo. Ginpunto pa sang kongresista nga kun wala ang CHR wala naman sang may maga-imbestigar sa mga kamala-malahan kag pagpang-abuso sang mga pulis, militar, mga opisyal kag empleyado sang gobyerno sa mga sibilyan nga wala sang igkasarang agud ipakigbato ang ila tawhanon nga kinamatarong.
