Ta expecta el joven consejal BG Guingona que hay suporta el mayoriya del myembros del consejo con el re-filing del su antes ordinansa aserca el requirimiento de poner mga Close Circuit Television (CCTV) na mga establisemiento de negocio na entero ciudad.
Na entrevista del RMN Zamboanga enantes aga, si Guingona ya habla cay amediante el siguiditos insidente de tiroteo y subida na mga soceso de crimen ta sale reportao na policia, hinde esta favorable con l imaje del ciudad de Zamboanga.
Asegun con Guingona que de antes pa gayot ele ta recomenda adopta este ordinansa para hay chene major participacion el mga negociante por el campanya contra crimen y lo mismo proteje canila na mal-plano de estos mga criminal pormedio del mga recordings na instolao CCTV na diila mismo establisemiento.
Bajo na profuesto ordinansa, el cada negocio que chene capitalization de tres para singco milyones de pesos debe pone mga CCTV cameras adentro y apuera del establisemiento. Un cosa que nuay conforma antes el sector de negocio porcausa asegun del caro presyo del mga CCTV.
Sin embargo, otro storya ya asegun este tiempo cay manada ya barato de calidad mga CCTV cameras que ta vende na Mercado.
No cumbiene aquellos lang mga considerao high-risk business establishment el debe cumpli coneste, donde mas major asegun si voluntariamente coneste cumpli el tal negosyante por el us mismo proteccion na maldad. – *Bhong Simbajon/RMN News*
