Gipahimangnoan sa Cagayan de Oro City Peace, Development and Security Council kon CPDSC ang publiko nga magmatngon ug magbantay kanunay aron dili mabiktima sa ‘investment scam’.
Kini pinaagi ni City Department of Interior and Local Government Director Engr. Jane Docallos atol sa tigom sa CPDSC nga gidumala ni Mayor Oscar Moreno, kauban sila Kagawad Romeo Calizo ug Acting City Administrator Teddy Sabuga-a Jr.
Giabisohan ni Docallos ang katawhan sa syudad nga dili basta-basta magpahaylo o’ magpadani sa pag-invest sa ilang hinagoan nga kwarta ngadto sa mga indibidwal, grupo o’ organisasyon nga nagpatuong legal ang ilang negosyo.
Gipasabot ni Docallos nga matino lamang kung legal ang gisudlan nga negosyo kon ‘investment’ kung duna kini’y mga pertinenteng dokumento ug permit, ilabina kung naghupot ang usa ka investor og registration certificate gikan sa Securities and Exchange Commission kon SEC.
Alayon niini, nanawagan usab si Engr. Docallos sa suporta sa katawhan ug mga opisyales sa barangay sa pagtaho gilayon sa mga otoridad, partikular sa National Bureau of Investigation kung dunay mamatikdan nga naghimo og ‘investment scam’ sa ilang barangay.
Natuki sa CPDSC ang isyu human nahimong sentro sa kontrobersiya ang pagpaundang ni Presidente Duterte sa Kapa-Community Ministry International, Inc., usa ka non-profit, non-stock religious group tungod kay matud pa usa ka paagi sa ‘pyramiding scheme’ ug ‘syndicated estafa’ ang operasyon niini.
