BAGO CITY, NEGROS OCCIDENTAL – Nag-angkon sang menor gid lamang nga kapilasan ang 19 sa 27 ka mga pasahero sang isa ka Ceres bus matapos aksidente nakabunggo sa isa ka salakyan nga Montero may mga las 5:30 sini gid lamang nga kaagahon sa area sang Purok Paho, Brgy. Sampinit, Bago City.
Ang driver sang bus ginkilala kay Rolando Sonderia, 45 anyos, tumandok sang Brgy. Bantayan, Kabankalan City, samtang ang driver naman sang Montero ginkilala nga si Ramil Jonas, 32 anyos, residente sang Brgy. Banago.
Suno sa initial investigation sang Bago City Police Station nga ang bus naghalin sa Kabankalan City kag magapadulong na kuntani sa ciudad sang Bacolod sakay ang 24 ka pasahero, samtang ang Montero, wala sang pasahero kag magapadulong naman sa banwa sang Hinigaran.
Ginpahayag sang driver sang Montero nga naglupok ang goma sa unahan nga bahin sang iya salakyan gani nadulaan ini sang kontrol rason nga nagbungguanay ini sila sang nagasugata nga bus.
Angut sini, ginpahayag sang Deputy for Operation sang Bago City Police Station PLt. Leonel Adolacion nga gin-hold anay nila sa karon ang driver sang Ceres bus kag Montero.
Samtang, gilayon naman nga gindala sa bululngan ang mga nasamaran kag yara na karon sa safe kag stable nga kondisyon.
[image: image.png]
