Ginpasaka na sang Criminal Investigation and Detection Group (CIDG) sa Bacolod City Prosecutors Office ang kaso batuk sa 21 ka mga persona lakip na ang duha ka barangay officials, barangay secretary kag mga surveyor sang Barangay Alangilan bangud sa gin-alegar anomaliya sa social amelioration program (SAP).
Kaso nga paglapas sa R.A 3019 – Anti Graft and Corrupt Practices Act, R.A 6713 – Code of Conduct and Ethical Standards for Public Officials and Employees kag R.A 11469 – Bayanihan to Heal as One Act ang paga-atubangon sang 21 ka mga persona.
Ginkilala ang mga opisyal nga ginpasakaan sang kaso nga sanday; Punong Barangay Degie Tanista Sr., Kagawad Michael Solano, Barangay Secretary Lemia Magan kag iban pa ka mga barangay staff kag surveyor.
Suno kay Chief Master Sgt. Ramiro Gocotano, hepe sang CIDG- Bacolod sa interview sang DYHB, may mga ebidensya nga ila nakuha kag nadiskubrehan nga may yara sang pinilian kag ginpaburan ang mga naga survey bangud kalabanan sa mga himata sang mga ginareklamo ang nakabaton sang Sies mil pesos (P6,000) nga ayuda.
Dugang ni Gocotano nga may ara man nakabaton sang ayuda nga indi pumuluyo sang barangay.
Ginpahayag sang mga tag-reklamo nga madamo sang mas pigado nga dapat makabaton sang ayuda apang wala gindala ang ila ngalan sa programa.
Ila man nadiskubrihan nga madamo sang nadala kag nakabaton sang ayuda ang may sarang kag maayo ang pangabuhi.
[image: image.png] [image: image.png]
